చాకో ఫ్రెంచ్ టోస్ట్

బ్రెడ్ ఇంట్లో ఉంది అంటే రకరకాల టోస్ట్ లు  చేస్తూనే ఉంటాము.పిల్లలూ 

ఇష్టంగా తింటారు కూడా.రెగ్యులర్ గా చేసే ఫ్రెంచ్ టోస్ట్ నే కొంచెం 

వెరైటీగా చేస్తే బావుంటుంది.చాకో ఫ్లేవర్ తో ఎట్రాక్టివ్ గా ఉంటుంది.

కావలసిన పదార్ధాలు:

బ్రెడ్                            నాలుగు స్లైసులు 

ఎగ్స్                            రెండు 

పాలు                          అర కప్పు 

పంచదార                     రెండు టేబుల్ స్పూన్స్ 

కోకో పౌడర్                   ఒక టేబుల్ స్పూన్ 

బేకింగ్ పౌడర్                చిటికెడు 

వెనీలా ఎసెన్స్               కొద్దిగా 

నెయ్యి                        రెండు స్పూన్స్

కాజూ,బాదం                 ఒకస్పూన్  

తయారు చేసే విధానం:

ముందుగ ఎగ్స్ బ్రేక్ చేసి ఒక బౌల్ లోకి తీసుకుని పంచదార కలిపి బీట్ 

చెయ్యాలి.

ఇందులో పాలు,కోకో పౌడర్ వేసి మళ్ళీ బీట్ చెయ్యాలి.

చివరగా బేకింగ్ పౌడర్,ఎసెన్స్ వేసి కలపాలి.

బ్రెడ్ స్లైసెస్ ను ఈమిశ్రమంలో రెండువైపులా ముంచి తావాపై పెట్టాలి.

నెయ్యి వేసి రెండు వైపులా కాల్చాలి.

ఈ స్లైసెస్ ను రెండుగా కట్ చేసి కాజూ,బాదం పౌడర్ చల్లి సర్వ్ 

చెయ్యాలి.లేదా ఫ్రెష్ ఫ్రూట్ పీసెస్ తో అయినా సర్వ్ చెయ్యొచ్చు.

చాకో ఫ్రెంచ్ టోస్ట్

డబల్ కా మీటా

చాలా పాపులర్ హైదరాబాదీ స్వీట్ ఇది.ఈ స్వీట్ ను ఒక్కొక్కరు ఒక్కో 

పధ్ధతిలో చేస్తారు.ఎలా చేసినా చాలా రుచిగా ఉంటుంది.నెయ్యి కాస్త 

ఎక్కువే పడుతుంది కానీ ఎప్పుడన్నా ఒకసారి తింటాము కనుక పర్లేదు.

కావలసిన పదార్ధాలు:

బ్రెడ్ స్లైసెస్                          నాలుగు 

పంచదార                           ఒక కప్పు 

పాలు                              రెండు కప్పులు 

నెయ్యి,ఇలాచీ పొడి ,కాజూ,కిస్మిస్ 

తయారు చేసే విధానం:

బ్రెడ్ స్లైసెస్ ను ఎండలో కానీ,ఫ్యాన్ గాలికి కానీ ఆరబెట్టాలి.వాటిలో 

తడి అంతా పోయి డ్రైగా అవుతాయి.ఇలా చేయడం వలన నెయ్యి 

కొంచెం తక్కువ పీల్చుకుంటాయి. 

వీటిని నేతిలో వేయించి తీసుకుని పాలలో వేసి నాననివ్వాలి.

పంచదారలో కొంచెం నీళ్ళు పోసి పాకం వచ్చాక ఇలాచీ పొడివేసి కలిపి 

పాలల్లో నానిన బ్రెడ్ స్లైసెస్ ను వేయాలి.మొత్తం ఉడికి నెయ్యి బయటికి 

వస్తుండగా స్టవ్ ఆఫ్ చెయ్యాలి.మిశ్రమం ఉడికేటప్పుడు ఎక్కువగా 

గరిటతో కలపకూడదు.అలా చేస్తే హల్వాలాగా అయిపోతుంది.బ్రెడ్ 

చిన్నచిన్న పీసెస్ గా ఉంటేనే బావుంటుంది.

ఒక బౌల్ లోకి తీసుకుని నేతిలో వేయించిన కాజూ,కిస్మిస్ లతో 

అలంకరించుకోవాలి.

డబల్ కా మీటా

బ్రెడ్ దోశ

ఇంట్లో ఎప్పుడూ ఉండే బ్రెడ్ తో చేసుకునే ఈ దోశ పిల్లలకి వెరైటీగా 

ఉంటుంది.చాలా త్వరగా అయిదు నిమిషాల్లో దోశ మిశ్రమం రెడీ 

చేసేసుకోవచ్చు.

కావలసిన పదార్ధాలు:

బ్రెడ్ స్లైసెస్                       ఆరు 

బొంబాయిరవ్వ                అర కప్పు 

బియ్యంపిండి                  రెండు టేబుల్ స్పూన్స్ 

ఉల్లిపాయ                       ఒకటి 

పచ్చిమిర్చి                     రెండు

కారట్ తురుము              రెండు స్పూన్స్ 

అల్లం,కొత్తిమీర,కరివేపాకు,నూనె,ఉప్పు 

తయారు చేసే విధానం:

బ్రెడ్ ను చిన్న ముక్కలు చేసి మిక్సీ జార్లో వేసి గ్రైండ్ చెయ్యాలి.

ఇందులో రవ్వ,బియ్యంపిండి వేసి కొంచెం నీళ్ళుపోసి మెత్తగా గ్రైండ్ 

చేసుకోవాలి   

ఈ మిశ్రమాన్ని ఒక బౌల్ లోకి తీసుకుని తగినంత ఉప్పు,నీళ్ళు పోసి 

కలిపి దోసెల పిండిలా చేసుకుని ఒక అరగంట నాననివ్వాలి.

ఇందులో సన్నగా తరిగిన ఉల్లి,మిర్చి,అల్లం,కొత్తిమీర,కరివేపాకు,

కారట్ తురుము అన్నీ వేసి కలపాలి 

నాన్ స్టిక్ తవా పైన ఈ మిశ్రమాన్ని చిన్నచిన్న దోసెలు పోసుకుని 

నూనె వేసి రెండువైపులా కాల్చాలి.

వేడివేడిగా ఏదైనా చట్నీతో కానీ,సాస్ తో కానీ సర్వ్ చేస్తే బావుంటుంది.

బ్రెడ్ దోశ

డేట్స్ - బ్రెడ్ లడ్డు

సింపుల్ గా అప్పటికప్పుడు చెయ్యగల లడ్డూ ఇది.ఖర్జూరాలు,నట్స్,

కొబ్బరి అన్నీఉంటాయి కనుక హెల్దీ కూడా. 

 
కావలసిన పదార్ధాలు:

బ్రెడ్ స్లైసెస్                        నాలుగు 

ఖర్జూరాలు                         పది

కొబ్బరితురుము                 అర కప్పు 

పంచదారపొడి                   మూడు స్పూన్స్ 

నెయ్యి                          రెండు టేబుల్ స్పూన్స్ 

ఇలాచీ పొడి                     కొద్దిగా 

కాజు,బాదం,కిస్మిస్ 

తయారు చేసే విధానం:

బ్రెడ్ స్లైసెస్ ను మిక్సీలో వేసి క్రంబ్స్ చేసుకోవాలి.

ఒక స్పూన్ నెయ్యి వేడిచేసి వీటిని దోరగా వేయించుకోవాలి.(మైక్రోవేవ్ 

లో అయితే రెండు నిముషాలు హైలో పెట్టి, టెంపరేచర్ తగ్గించి మరో 

నిమిషం పెడితే సరిపోతుంది)

ఒక స్పూన్ నెయ్యి వేడిచేసి కాజు,బాదం,కిస్మిస్ వేయించి తీయాలి.

ఇందులోనే కొబ్బరి తురుము కూడా వేసి ఒక నిమిషం వేయించాలి.

ఇప్పుడు బ్రెడ్,తరిగిన ఖర్జూరాలు,కొబ్బరి,పంచదార అన్నీఒకసారి 

గ్రైండ్ చేసి బౌల్ లోకి తీసుకోవాలి.

ఇలాచీపొడి,నట్స్ వేసి కలిపి లడ్డూలు చుట్టుకోవాలి.

డేట్స్ - బ్రెడ్ లడ్డు

పనీర్ - స్వీట్ కార్న్ టోస్ట్

స్వీట్ కార్న్,పనీర్ కలిపి చేసే ఈ టోస్ట్ వెరైటీగా ఉంటుంది.ఉదయం 

బ్రేక్ ఫాస్ట్ కైనా, ఈవెనింగ్ స్నాక్స్ గా అయినా బావుంటుంది.

కావలసిన పదార్ధాలు :

బ్రెడ్                               నాలుగు స్లైసులు 

స్వీట్ కార్న్                       ఒక కప్పు 

పనీర్                             అర కప్పు 

ఉల్లిపాయ                         ఒకటి 

మిర్చి                             రెండు 

కొత్తిమీర                          కొంచెం

ఉప్పు,మిరియాలపొడి,చీజ్,టమాటాసాస్, 

ఒక టీ స్పూన్ వెన్నలేదా నెయ్యి  

తయారు చేసే విధానం:

స్వీట్ కార్న్ ఉడికించి కోర్స్ గా గ్రైండ్ చేసుకోవాలి.

ఇందులోతురిమిన పనీర్ సన్నగా తరిగిన ఉల్లిపాయ,మిర్చి,కొత్తిమీర,

ఒక టేబుల్ స్పూన్ టమాటాసాస్,ఉప్పు,మిరియాలపొడి వేసి బాగా 

మిక్స్ చెయ్యాలి.

బ్రెడ్ పైన  కొంచెం వెన్న, నెయ్యి రాసి కార్న్ మిశ్రమం సర్దాలి 

మైక్రోవేవ్  కన్వెక్షన్ మోడ్ లో 200 డిగ్రీలకు ప్రీహీట్ చెయ్యాలి.

ఇప్పుడు కార్న్ మిశ్రమం మీద చీజ్ వేసి అయిదారు నిముషాలు లేదా 

చీజ్ కరిగేవరకు బేక్  చెయ్యాలి.

టమాటా సాస్ తో వేడిగా తింటే క్రిస్పీగా బావుంటాయి.  

                

పనీర్ - స్వీట్ కార్న్ టోస్ట్

బ్రెడ్ రోల్స్

పిల్లలు చాలా ఇష్టంగా తినే స్నాక్ ఈ బ్రెడ్ రోల్స్.కూర రెడీగా ఉంటే 

అయిదు నిమిషాల్లో చేసిపెట్టొచ్చు.లోపల ఫిల్లింగ్ మన ఇష్టం.ఆలూ 

కర్రీ,మిక్స్డ్ వెజ్ కర్రీ,పనీర్,కాలీఫ్లవర్ ఇలా ఏ కూర అయినా వాడొచ్చు.

కావలసిన పదార్ధాలు :

బ్రెడ్                                నాలుగు స్లైసులు 

ఆలూ కర్రీ                         ఒక కప్ 

నూనె,టమాటా సాస్ 

తయారు చేసే విధానం;

బ్రెడ్ స్లైసెస్ అంచులు కట్ చేసుకోవాలి.

ఒక బౌల్ లో నీళ్ళు తీసుకుని బ్రెడ్ ను వేసి వెంటనే తీసి అరచేతుల  

మధ్య ఉంచి నొక్కి నీళ్ళు వత్తెయ్యాలి.

స్లైస్ మధ్యలో కూర పెట్టి రోల్ లాగా చెయ్యాలి.ఇలా అన్నిరోల్స్ రెడీ 

చేసుకుని కాగిన నూనెలో ఎర్రగా వేయించి తీయాలి.

వేడిగా టమాటా సాస్ తో తింటే బావుంటాయి.

బ్రెడ్ రోల్స్

చోలే - బ్రెడ్ ఛాట్

ఛాట్ ఐటమ్స్ ఏవైనా సరే అందరం ఇష్టంగా తింటాము.చోలే, బ్రెడ్ 

కలిపి చేసే ఈ ఛాట్ వెరైటీగా బావుంటుంది.

కావలసిన పదార్ధాలు:

చోలే                                    రెండు కప్పులు 

బ్రెడ్                                    నాలుగు స్లైసులు 

ఉల్లిపాయలు                           రెండు 

మిర్చి                                  మూడు

ఆలూ                                  రెండు 

టమాట                                రెండు 

అల్లంవెల్లుల్లి ముద్ద                   ఒక టీ స్పూన్ 

చోలే మసాల                         ఒక టేబుల్ స్పూన్ 

కొత్తిమీర                              ఒక కట్ట 

ఉప్పు,కారం                          తగినంత 

పసుపు                              కొంచెం

సన్నకారప్పూస                     కొద్దిగా 

నూనె                                రెండు టేబుల్ స్పూన్స్

ఛాట్ మసాల                        అర టీ స్పూన్ 

 నిమ్మరసం                          ఒక టీ స్పూన్

జీలకర్ర                                పావు స్పూన్ 

కరివేపాకు                           ఒక రెమ్మ

తయారు చేసే విధానం:

శనగలను  నానబెట్టుకోవాలి.

నూనె వేడిచేసి జీలకర్ర,కరివేపాకు వేసి సన్నగా తరిగిన ఉల్లి,మిర్చి వేసి 

దోరగా వేయించాలి .

ఇప్పుడు అల్లంవెల్లుల్లి పేస్ట్ వేసి వేయించి,ఆలూ ముక్కలు,శనగలు 

వేసి కలపాలి.

రెండు నిముషాలు వేయించి,ఉప్పు,కారం,పసుపు,వేసి కలిపి టమాట 

ముక్కలు కూడా వేసి ఒక గ్లాస్ నీళ్ళు పోసి పాన్ మూత పెట్టెయ్యాలి.

ఆరేడు విజిల్స్ రానిస్తే శనగలు మెత్తగా ఉడుకుతాయి,

స్టీం పోయిన తరువాత తీసి చోలే మసాల ,కొత్తిమీర  వేసి  కూర 

చిక్కబడేదాక  ఉడికించుకోవాలి.

ఈలోగా బ్రెడ్ ను చిన్న ముక్కలుగా కట్ చేసుకుని నూనెలో వేయించి 

తీసుకోవాలి.లేదా నెయ్యి,వెన్న వేసి తవాపై కూడా టోస్ట్ చేసుకోవచ్చు

కానీ క్రిస్ప్ గా ఉండాలి.

ఇప్పుడు బ్రెడ్ ముక్కలు ఒక ప్లేట్లో పెట్టి పైన చోలే కూర వేయాలి.కొన్ని 

బ్రెడ్ ముక్కలు  పైన కూడా వేయాలి.

సన్నగా తరిగిన ఉల్లి,మిర్చి,కొత్తిమీర,కొంచెం ఛాట్ మసాల చల్లి,

నిమ్మరసం వేసి పైన సన్న కారప్పూసతో అలంకరిస్తే నోరూరించే ఛాట్ 

రెడీ అవుతుంది.

చోలే - బ్రెడ్ ఛాట్

యాపిల్ బ్రెడ్ హల్వా

హల్వా అనగానే జనరల్ గా కారట్,సొరకాయ,బీట్రూట్ వీటితోనే 

ఎక్కువ చేస్తాము.కొంచెం వెరైటీగా యాపిల్ తురుము,బ్రెడ్ కలిపి చేసే 

ఈ హల్వా రుచిగా డిఫెరెంట్ టేస్ట్ తో పిల్లలకి చాలా నచ్చుతుంది.

 కావలసిన పదార్ధాలు:

యాపిల్                       ఒకటి 

బ్రెడ్                            నాలుగు స్లైసెస్

పాలు                          రెండు కప్పులు 

నెయ్యి                        మూడు టేబుల్ స్పూన్లు 

పంచదార                     ఒకటిన్నర కప్ 

ఇలాచీ పొడి                   పావు స్పూన్

కాజూ,బాదం  

 తయారు చేసే విధానం :

ముందుగ బ్రెడ్ స్లైసెస్ ని క్రంబ్స్ గ చేసుకోవాలి.

ఒక స్పూన్ నెయ్యి వేడిచేసి ఈ క్రంబ్స్ ను దోరగా వేయించి తీసుకోవాలి 

మైక్రోవేవ్ లో అయితే ఒక నిమిషం హైలో పెట్టి తరువాత టెంపరేచర్ 

తగ్గించి మరో రెండు నిముషాలు పెడితే చక్కగా క్రిస్ప్ గా ఫ్రై అవుతాయి.

ఒక స్పూన్ నెయ్యి వేడిచేసి కాజూ వేయించి తీసుకోవాలి.ఇదే నేతిలో 

యాపిల్ తురుము వేసి వేయించాలి.

తురుము వేగిన తరువాత బ్రెడ్ క్రంబ్స్ కూడా వేసి కలపాలి 

ఇప్పుడు పాలు,పంచదార వేసి సన్నని మంటపై బాగా దగ్గర పడేవరకు 

ఉడికించి ఇలాచీ పొడి,మిగిలిన నెయ్యి వేయాలి.

ఒక బౌల్ లోకి తీసుకుని కాజూ,బాదంతో అలంకరిస్తే ఎంతో రుచిగా 

ఉండే యాపిల్ బ్రెడ్ హల్వా నోరూరిస్తుంది.  

యాపిల్ పుల్లగా ఉంటే పాలు వేయగానే విరిగిపోయే అవకాశం ఉంది.

అందుకని పులుపు లేకుండా ఉంటే బావుంటుంది.

ఇష్టం ఉన్నవారు ఇంకొంచెం నెయ్యి వేసుకోవచ్చు.

యాపిల్ బ్రెడ్ హల్వా

ఆలూ బ్రెడ్ స్నాక్

ఆలూ,బ్రెడ్ చేతిలో ఉంటే రకరకాల స్నాక్స్ చెయ్యొచ్చు.అందులోనూ 

పిల్లలు ఈ రెండూ ఎంత ఇష్టపడతారో చెప్పక్కర్లేదు.బేసిక్ ఆలూ కూర 

చేసుకుని ఉంచుకుంటే ఏ స్నాక్ అయినా నిమిషాల్లోఅయిపోతుంది.

సమోసా,బ్రెడ్ రోల్స్,ఆలూ బోండా,ఆలూ రోల్స్ ఇలా ఎన్నో.అలా 

బ్రెడ్,ఎగ్,ఆలూ కాంబినేషన్ లో చేసే ఈ స్నాక్ చాల రుచిగా ఉంటుంది.

కావలసిన  పదార్ధాలు :

బ్రెడ్                               నాలుగు స్లైసులు 

ఆలూ కర్రీ                        ఒక కప్పు 

ఎగ్                                 ఒకటి 

ఉప్పు,కారం                      కొంచెం

నూనె                            ఒక టీ స్పూన్ 

తయారు చేసే విధానం;

ఎగ్ ను కొంచెం బీట్ చెయ్యాలి.ఇందులో కొంచెం ఉప్పు,కారం వేసి బీట్ 

చేసి ఉంచుకోవాలి.

బ్రెడ్ స్లైసెస్ ని ఏదైనా మూతతో రౌండ్ గా కట్ చేసుకోవాలి.

ఒక స్లైస్ మీద ఆలూకర్రీ పెట్టి రెండో స్లైస్ దాని మీద ఉంచి కొంచెం ప్రెస్ 

చెయ్యాలి.

ఇప్పుడు దీనిని బీట్ చేసిన ఎగ్ లో రెండు వైపులా ముంచి పేనంపై పెట్టి 

కొంచెం నూనె వేసి మంచి కలర్ వచ్చేదాకా ఉంచాలి.పిల్లలకి  నెయ్యి 

అయినా వాడొచ్చు.

అలాగే రెండో వైపు కూడా వేయించి తీసుకోవాలి.

గ్రీన్ చట్నీ లేదా టమాటో కెచప్ తో సర్వ్ చేస్తే చాల రుచిగా ఉంటుంది.

ఎగ్ తిననివారు శనగపిండి,కొంచెం వరిపిండి,ఉప్పు,కారం,చిటికెడు 

సోడా అన్నీ బజ్జీల పిండిలా కలుపుకుని ఈ ఆలూ బ్రెడ్ స్లైసెస్ ని 

అందులో ముంచి తావాపై రెండువైపులా వేయించి చేసుకోవచ్చు.

ఆలూ బ్రెడ్ స్నాక్

సింపుల్ ఎగ్ టోస్ట్

చాలా త్వరగా చేయగల స్నాక్ ఇది స్కూల్ నుండి రాగానే పిల్లలకి ఇస్తే

చాలా ఇష్టంగా తింటారు.ఎందుకోగానీ బ్రెడ్ ఆమ్లెట్ కంటే ఇది ఎక్కువగా 

ఇష్టపడతారు.

కావలసిన పదార్ధాలు :

బ్రెడ్                             నాలుగు స్లైసులు 

ఎగ్స్                             రెండు 

ఉల్లిపాయ                      ఒకటి 

మిర్చి                          రెండు 

కొత్తిమీర                       పావుకప్పు 

ఉప్పు,కారం                    తగినంత 

నెయ్యి                        రెండు స్పూన్లు 

కారట్ తురుము కానీ,తురిమిన చీజ్ కానీ,పనీర్ కానీ ఇష్టాన్ని బట్టి 

ఏదో ఒకటి కలుపుకోవచ్చు,నేను కొంచెం చీజ్ తురుము కలిపాను 

తయారు చేసే విధానం:

సన్నగా తరిగిన ఉల్లి,మిర్చి,కొత్తిమీర,తగినంత ఉప్పు,కారం అన్నీ ఒక 

బౌల్ లో వేసి కలపాలి.

ఎగ్స్ బ్రేక్ చేసి ఇందులో వేసి కొంచెం బీట్ చెయ్యాలి.

చివరిగా కారట్,పనీర్,చీజ్ ఏదో ఒకటి తురుము వేసి కలపాలి.

ఇప్పుడు ఒకో బ్రెడ్ స్లైస్ నీ ఈ మిశ్రమంలో ముంచి రెండువైపులా పట్టించి

జాగ్రత్తగా పెనంపై పెట్టాలి 

కొంచెం నెయ్యివేసి రెండు వైపులా మంచి కలర్ వచ్చేవరకూ వేయించి 

టమాట కెచప్ తో ఇస్తే బావుంటుంది.

సింపుల్ ఎగ్ టోస్ట్

బ్రెడ్ కారట్ బాసుంది

బ్రెడ్ తో ఏ స్వీట్ చేసినా చాలా రుచిగా ఉంటుంది.పిల్లలూ ఇష్టంగా 

తింటారు ఎక్కువ నెయ్యి అవసరం లేకుండా సింపుల్ గా రెడీ అయ్యే 

ఈ స్వీట్ కి కొంచెం కారట్ జత చేస్తే కలర్ ఫుల్ గా ఈ బాసుంది 

తయారవుతుంది.

కావలసిన పదార్ధాలు:

బ్రెడ్                           నాలుగు స్లైసులు 

కారట్ తురుము             ఒక కప్పు 

పంచదార                     ఒకటిన్నర కప్పు 

పాలు                          అరలీటరు 

నెయ్యి                         రెండు టేబుల్ స్పూన్లు 

ఇలాచీ పొడి                   ఒక స్పూను 

కాజూ                           పది 

యిన్ స్టంట్ బాదం మిక్స్ పౌడర్  ఒక స్పూను 

తయారు చేసే విధానం :

బ్రెడ్ స్లైసెస్ ని మిక్సీ లో వేసి క్రంబ్స్ గా చేసుకోవాలి .

ఒక టేబుల్ స్పూన్ నెయ్యి వేడి చేసి ఈ క్రంబ్స్ ని కొంచెం వేయించి 

తీసుకోవాలి 

ఇంకో టేబుల్ స్పూన్ నెయ్యి వేడి చేసి కారట్ తురుమును కొంచెం 

వేయించాలి.

పాలని కొంచెం మరిగించి అందులో ఈ వేయించిన బ్రెడ్ క్రంబ్స్,కారట్ 

తురుము వేసి కొంచెం ఉడకనివ్వాలి.

ఇప్పుడు పంచదార కలిపి కొంచెం చిక్కబడేదాకా ఉడికించి ఇలాచీ పొడి

వేసి కలపాలి.

యిన్ స్టంట్ బాదంమిక్స్ పౌడర్ వేసి బాగా కలిపి స్టవ్ ఆఫ్ చెయ్యాలి.

ఇది వేస్తే కొంచెం ఫ్లేవర్,కలర్ బావుంటుంది.లేకపోయినా పర్లేదు. 

ఒక బౌల్ లోకి తీసుకుని వేయించిన కాజూతో  అలంకరించాలి.

ఫ్రిజ్ లో ఉంచి చల్లగా సర్వ్ చేస్తే ఈ బాసుందీ చాలా రుచిగా ఉంటుంది.

బ్రెడ్ కారట్ బాసుంది

ఈజీ బ్రెడ్ టోస్ట్

బ్రెడ్ తోఎన్నిరకాల టోస్ట్ లు అయినా నిమిషాల్లో చేసుకోవచ్చు.జనరల్ 

గా చేసే చీజ్ టోస్ట్ లు కాకుండా రవ్వ, కూరగాయల కాంబినేషన్ లో 

ఈ టోస్ట్ వెరైటీ గా ఉంటుంది.ఈ మిశ్రమం రెండు మూడు రోజులు ఫ్రిజ్ 

లో స్టోర్ చేసుకోవచ్చు.

కావలసిన పదార్ధాలు:

బొంబాయిరవ్వ               ఒక కప్పు 

పెరుగు                        ఒక కప్పు 

ఉల్లిపాయ                     ఒకటి 

మిర్చి                         రెండు మూడు 

కారట్ తురుము             అర కప్పు 

కాప్సికం                      ఒకటి 

టమాటా                     ఒకటి 

కొత్తిమీర                      అర కప్పు 

అల్లం                          చిన్న ముక్క 

ఉప్పు                          తగినంత 

నూనె                         రెండు టేబుల్ స్పూన్లు

టమాటాసాస్ 

తయారు చేసే విధానం:

ముందుగా పెరుగు లో బొంబాయిరవ్వ వేసి  కలిపి ఒక గంట సేపు 

నాననివ్వాలి.

నానిన రవ్వలో సన్నగా తరిగిన ఉల్లి,మిర్చి.కాప్సికం, టమాటా, 

కొత్తిమీర, పుదీనా,అల్లం వేయాలి.

కారట్ తురుము ,ఉప్పు కూడా వేసి బాగా కలపాలి.మిశ్రమం గట్టిగ 

ఉంది అనుకుంటే కొంచెం నీళ్ళు కలపొచ్చు .

ఇప్పుడు బ్రెడ్ స్లైసెస్ తీసుకుని ఒకవైపు ఈ మిశ్రమాన్ని అప్లై చెయ్యాలి.

పేనం వేడి చేసి కొంచెం నూనె వేసి ముందు  మిశ్రమం లేని వైపున 

ఉంచి కొంచెం వేగాక మెల్లగా తిప్పి సన్నని సెగపై  కాలనివ్వాలి.

గోల్డెన్ బ్రౌన్ కలర్ వచ్చాక తీసుకుని టమాటా సాస్ తో సర్వ్ చేస్తే 

బావుంటుంది.

ఈజీ బ్రెడ్ టోస్ట్

బ్రెడ్ 65 (మంచూరియా )

బ్రెడ్ తో రకరకాల వెరైటీలు నిమిషాల్లో చేసుకోవచ్చు.ఉదయం టిఫిన్

కోసం అయినా, సాయంత్రం స్నాక్స్ కోసమైనా బ్రెడ్ ఇంట్లో ఉంటే హ్యాపీ.

నాలుగు స్లైసులు బ్రెడ్ ఉంటే ఈ రోజు బ్రెడ్ 65 చేశాను. తోటకూర పప్పు 

కూరలోకి జతగా చాలా బావుంది.మీరూ ట్రై చెయ్యండి.

కావలసిన పదార్ధాలు:


బ్రెడ్                    నాలుగు స్లైసులు 

ఉల్లిపాయ              ఒకటి 

మిర్చి                  నాలుగు 

కారట్ తురుము      కొంచెం 

కాప్సికం               ఒకటి చిన్నది 

ఉప్పు,కారం           తగినంత

పెరుగు                ఒక కప్పు 

వెల్లుల్లి                  నాలుగు రెబ్బలు 

కరివేపాకు              రెండు రెమ్మలు 

నూనె                   తగినంత



తయారు చేసే విధానం:

ముందుగా బ్రెడ్ స్లైసెస్ ని నీళ్ళల్లో వేసి వెంటనే పిండి ఒక బౌల్ లో 

వేసుకోవాలి.

ఇందులో సన్నగా తరిగిన ఉల్లి, ఒక మిర్చి,కాప్సికం, కారట్ తురుము,

కొంచెం ఉప్పు వేసి బాగా కలిపి చిన్న చిన్న ఉండలు చేసి ఉంచుకోవాలి.

నూనె వేడి చేసి ఈ ఉండలు వేసి ఎర్రగా వేయించి తీసుకోవాలి.

ఇప్పుడు వేరే పాన్ లో ఒక స్పూన్ నూనె వేడి చేసి సన్నగా తరిగిన 

వెల్లుల్లి,మిర్చి,కరివేపాకు వేసి వేయించాలి.

కొంచెం వేగిన తరువాత బ్రెడ్ ఉండలు వేసి చిటికెడు ఉప్పు,కారం వేయాలి.

ఇప్పుడు పెరుగును కొంచెం బీట్ చేసి ఇందులో వేసి సన్నని సెగపై

అంతా  ఇగిరి పోయి పొడిపొడిగా అయ్యెవరకూ వేయించాలి

ఒక బౌల్ లోకి తీసుకుని సన్నగా తరిగిన కొత్తిమీర వేసి వేడి గా సర్వ్ 

చేస్తే బ్రెడ్ 65 నోరూరిస్తుంది.

ఇంకా ఇష్టం ఉన్నవారు సన్నగా తరిగిన కాబేజ్,ఉల్లి కాడలు కూడా 

కలుపుకోవచ్చు.

బ్రెడ్ మంచూరియా:

నూనె వేడిచేసి వెల్లుల్లి,మిర్చికరివేపాకు వేయించి,ఫ్రై చేసిన బ్రెడ్ 

ఉండలని వేసి ఒక స్పూన్ సోయాసాస్,ఒక స్పూన్ టమాటాసాస్,

ఒక స్పూన్ రెడ్ చిల్లి సాస్ వేసి,ఒక స్పూన్ కార్న్ ఫ్లోర్ ని నీటిలో

కలిపి పోసి డ్రై గా అయ్యేవరకూ వేయించితే బ్రెడ్ మంచూరియా రెడీ 

అవుతుంది.


 

బ్రెడ్ 65 (మంచూరియా )

బ్రెడ్ పుడ్డింగ్

కమ్మగా, మధురం గా ఉండే స్వీట్స్ అంటే అందరికీ ఇష్టమే.ఎన్ని 

తిన్నాఇంకా తినాలని అనిపిస్తుంది.  బ్రెడ్, ఎగ్స్ కలిపి చేసే ఈ 

పుడ్డింగ్ చేయడం చాలా సులువు. పిల్లలు చాలా ఇష్టం గా తింటారు 

కూడా.

కావలసిన పదార్ధాలు :

బ్రెడ్                   నాలుగు  స్లైసులు 

ఎగ్స్                  రెండు 

పాలు                 రెండు  కప్పులు 

పంచదార పొడి       ఒక కప్పు

వెనీలా ఎసెన్స్       అర స్పూను 

ఇలాచీ  పొడి         కొంచెం 

నెయ్యి                మూడు  టేబుల్ స్పూన్లు 

కాజూ,చెర్రీస్          అలంకరణకి  

తయారు చేసే విధానం :

ముందుగా బ్రెడ్ స్లైసెస్ ని  మిక్సీ లో క్రంబ్స్  లా చేసుకోవాలి. 

ఒక మైక్రోవేవ్ సేఫ్ బౌల్ లో  రెండు స్పూన్లు నెయ్యి, బ్రెడ్ క్రంబ్స్ వేసి  

ఒక నిమిషం హై లో పెట్టాలి.తరువాత ఒకసారి కలిపి టెంపరేచర్ తగ్గించి 

ఇంకో నిమిషం పెడితే క్రిస్ప్ గా ఫ్రై అవుతాయి.

ఒక బౌల్ లో ఎగ్స్ వేసి బాగా బీట్ చెయ్యాలి. ఇందులో పాలు,

పంచదార పొడి  వేసి  బాగా కలిసేలా బీట్ చెయ్యాలి.

ఈ బీట్ చేసిన మిశ్రమంలో వేయించిన బ్రెడ్ క్రంబ్స్, ఇలాచీ  పొడి , 

వెనీలా ఎసెన్స్ వేసి బాగా కలపాలి.

ఇప్పుడు ఓవెన్ ను కన్వెక్షన్ మోడ్ లో 220 డిగ్రీల లో ప్రీహీట్

చేసుకోవాలి 

తయారు చేసుకున్న బ్రెడ్ మిశ్రమాన్ని కొంచెం నెయ్యి రాసుకున్న 

బేకింగ్ మౌల్డ్ లో వేసుకుని పైన  కాజూ, చెర్రీస్ వేసి ప్రీహీట్  చేసుకున్న 

ఓవెన్ లో పదిహేను నిమిషాలు బేక్ చేసుకోవాలి   

వేడిగా తిన్నా, ఫ్రిజ్ లో ఉంచి చల్లగా తిన్నా చాలా రుచిగా ఉంటుంది.

బ్రెడ్ పుడ్డింగ్

వెరైటీ బ్రెడ్ స్నాక్

సన్నగా  చిరుజల్లులు పడుతుంటేనో, చలి గాలులు గిలిగింతలు  

పెడుతుంటేనో,  వేడివేడిగా  ఏమైనా  తినాలనిపిస్తుంది. ఎక్కువగా 

పకోడీలు,మిర్చిబజ్జి ఇవే చేస్తుంటాము. బ్రెడ్, పకోడీ కాంబినేషన్ లో 

చేసే ఈ స్నాక్  చాలా త్వరగా అయిపోతుంది. స్టవ్ పై నూనె వేడి 

అయ్యేలోపు రెడీ చేసుకుని చేసేయవచ్చు.

కావలసిన పదార్ధాలు:

బ్రెడ్                  4 స్లైసులు 

శనగపిండి          ఒక కప్పు 

వరిపిండి            రెండు టేబుల్ స్పూన్లు 

ఉల్లిపాయ           ఒకటి 

మిర్చి                రెండు 

అల్లం                చిన్న ముక్క 

కొత్తిమీర            కొంచెం 

కరివేపాకు          నాలుగు ఆకులు 

ఉప్పు                తగినంత 

వంటసోడా         చిటికెడు 

నూనె               డీప్ ఫ్రై కి సరిపడా 

టమాటాసాస్     

తయారు చేసే విధానం:

బ్రెడ్ స్లైసెస్ ని రెండుగా కట్ చేసుకోవాలి.

ఉల్లిపాయని వాలికలుగా, మిర్చి,అల్లం,కరివేపాకు ,కొత్తిమీర  వీటిని

సన్నగా తరగాలి.

శనగపిండి, వరిపిండి ఒక బౌల్ లో వేసి, తరిగినవి అన్నీ కలిపి ఉప్పు,

వంటసోడా వేసి కొంచెం నీటితో పకోడీ పిండిలా కలుపుకోవాలి.

ఇప్పుడు కట్ చేసిన బ్రెడ్ స్లైస్  ని తీసుకుని దానికి ఒక వైపు ఈ పకోడీ

పిండిని అప్లై చేసుకోవాలి.

కాగిన నూనెలో ఈ స్లైసు ను పిండి ఉన్నవైపు నెమ్మదిగా వదిలి రెండు

వైపులా గోల్డెన్ బ్రౌన్ కలర్ వచ్చేలా  వేయించాలి.

క్రిస్ప్ గా ఉండే బ్రెడ్ ఒక వైపు, స్పైసీగా ఉండే పకోడీ ఒకవైపు ఉండే

వీటిని టొమాటో సాస్ తో వేడిగా తింటే చాలా రుచి గా ఉంటాయి.

వెరైటీ బ్రెడ్ స్నాక్